塵氏終於有工開啦 Mail Sorter

塵氏喺祖國終於有微薄嘅收入啦! 塵太喺祖國嘅第一份工作係一份聖誕臨時工， 講起份工就真係一匹布咁長啦……

申請 Royal Mail Seasonal Mail Sorter 過程

是咁的，塵氏喺2021年9月中到埗，塵生見到Royal Mail 請聖誕臨時工做分信Seasonal Mail Sorter，人工唔錯，經驗不拘，塵太當然好鼓勵塵生去報啦，因為塵太諗住塵生去做塵太就唔使做，專心湊仔咁就爽yy (雖然當時我哋兩個都仲申請緊NI)。就喺塵生好開心咁狗衝咗嘅第二日早上，好快就收到Royal Mail 神速回覆。Royal Mail竟然係好直接咁話塵生唔符合要求…… 塵生當然就唔知自己衰乜， 可能係份申請表填錯嘢掛，塵太就嬲嬲哋，攞自己嚟做人體實驗，睇下會唔會同塵生一樣極速俾Royal Mail reject。

作為被命運選中嘅小朋友，Royal mail竟然無reject塵太，無幾耐仲叫塵太補交資料，咁塵太又好開心咁入去填表格，就係咁，如是者一個星期左右就叫我補交一次資料，補完又補，補完又補，來來回回，塵太都填咗同一份表格起碼四五次。塵太終於忍唔住send email 去問係咪真係要入咁多次一樣嘅嘢，Royal Mail就塵太: 你跟住做啦～我地份工好L多人申請㗎……

喺2021年10月中，塵太終於收到Royal Mail 封email話塵太啲嘢唔合資格，彈返轉頭畀塵太再補料。最神奇係竟然塵生都一樣收到補料email敗部復活。其實本身塵太都聽聞過有網友報料，就算過到呢個step，去到郵局做 document verification嘅時候，都會因為無NI而畀Royal Mail踢走。塵太本身都諗住算數收皮，但上帝竟然畀塵氏喺10月廿幾號收到個NI，塵生塵太就當然9秒9衝上網補料。

做Disclousure and Barring Service (DBS)

結果等了又等，塵生塵太終於終於喺11月廿幾號收到Royal Mail 嘅email， 叫我哋去郵局做document verification。 搞完對文件，Royal Mail 就同我地做DBS (Disclousure and Barring Service)，即係background check，佢講到明要15日做checking ，塵太都諗住收硬皮，check得黎都聖誕啦仲做鬼做馬咩～ 點知，竟然隔左一日，塵太就收到Royal Mail email黎嘅offer letter叫我11月尾去上training 返工。但因為驚塵生好快都會收到offer，塵太都唔敢第一時間狗衝accept個offer ，驚會撞時間冇人湊仔（因為塵生返工先係塵太嘅最大理想)。可惜世事豈能盡如人意，黑仔底嘅塵生依然收唔到offer email。塵太就唯有照accept offer，因為仲有幾日就要去training。塵太本來諗住專心湊仔，點知塵太竟然得到黎家之神嘅眷顧，就好似陪人去試鏡，竟然喺走廊比導演睇中左做主角，又或者陪人去港姐面試，最終攞左冠軍一樣……果然，塵太呢啲咁出色嘅女人，無論喺邊度，都好似漆黑中嘅螢火蟲一樣，咁鮮明，咁出眾……
塵太咁就踏入英國返工嘅生涯……

正式開工

作為被命運選中嘅小朋友，塵太喺指定嘅日子，就懷著戰戰兢兢嘅心情去 Royal Mail mail centre返工。 同塵太同一日入職嘅共有19人，全部人上完training之後，就各自埋位做嘢。 簡單啲講，啲包裹信件一車車用麻包袋運入嚟mail centre，同事就要根據件佢地嘅postcode去做sorting，sort好之後就再一車車咁運走，都係啲簡單嘅工作，但真心係體力勞動粗重功夫。塵太第一日就做scanning加sorting， 不停scan 啲Tracked 48嘅貨再掉入唔同代表唔同postcode嘅車仔。唔好諗住做幾多無人知好輕鬆，個經理係會每個鐘頭走嚟mark 低你scan咗幾多件，都唔係完全無壓力。第一日嘅時候，塵太都唔敢太活躍 ，而且又要講英文，只係識咗少少同事。大概做左3日後，塵太已經涉獵過唔同嘅工作崗位，基本上已經明白成個 mail centre嘅運作流程。

分Parcel主要係按Postal Area (郵域) 去分。英國嘅Post code最前嘅一或二個英文字就係Postal Area，係用一個或者兩個英文字母組成。由於有太多Postal Area，塵太對呢啲根本一竅不通， 塵太唯有自己諗方法記一記大概分派嘅位置。塵太竟然痴線到諗到用啲前同事嘅initial黎幫手記， 當中有SK OL CM SY KY NG SM FY CW…… 最好笑竟然係呢度張staff card 條batch同前公司一樣，都係綠色……

真心分享

其實工作過程並唔係塵太想分享嘅重點。 塵太黎到英國， 一路都好想可以做下嘢，練下英文之餘，識下朋友，希望可以快啲融入社會 。好感恩可以入到Royal Mail返工，事實上真係遇到好多唔同嘅人。有好多同事問塵太係唔係came from China，塵太就好specific咁話我係came from Hong Kong 。塵太第一日認識嘅一位女同事，佢同我一齊入職 ，應該係巴基斯坦人但係英國長大，聽英文完全無問題，但都係有口音。當塵太第一日仲係10下10下嘅時候，佢已經會走嚟問塵太scan咗幾多parcel…

有一位印度黎嘅女同事返左第一日就無再返黎……

有一位好年青嘅英國女同事，同我傾計，每晚佢Daddy都會黎車佢放工。

有一位男同事讀完心理學Master，未搵到工嚟呢度做攝時間。

有一位年青嘅男同事話，話佢有個Uncle係香港人，知道之前香港人一齊上街遊行。

有一位男同事竟然話我英文講得好。

有一位我初初黎到喺咁問佢嘢嘅男同事scan得好快，但原來佢嘅成功之道竟然係專登揀啲細件嘅貨黎scan。

有一位黎自越南嘅女同事黎左英國4年半，而家學緊英文，Royal Mail 係佢第一份工。

有一位年輕大學畢業生，男仔黎平時怕怕醜醜咁，最後兩日先同佢坐隔黎吹水，原來係佢讀政治，對香港嘅情況好了解，連天琦係邊個佢都知道…

塵太最深刻係有幾日，收工前塵太拆麻包袋拆到勁熱， 摺起晒衫袖 ，畀啲麻包袋刮損兩邊前臂。 當塵太檢查緊自己嘅傷勢嘅時候，有位比較年長嘅男同事問塵太做乜嘢，塵太話自己有啲get hurt ，佢就好好主動提出佢倒啲貨出嚟，塵太負責sorting啦～ 咁塵太當然lur 飯應，因為咁樣就唔使再畀啲麻包袋刮損手。塵太真係好感動，親身見證到英國男士好gentleman。佢仲同塵太講唔使趕。好不容易終於拆到收工， 呢位男同事仲好有默契咁同塵太擊掌give me five，彷彿係向塵太表達合作得好愉快。

平行宇宙另一邊嘅塵生，就喺塵太返左兩個星期 Royal Mail 之後，塵生終於收到 Royal Mail 通知，閣下終於完成左DBS 喇，但黑仔指數其高嘅塵生隨後收到另一封 email，話份工太多人申請，已經無位俾你返工喇，你都係冷返入去 waiting list 等運到啦，by the way，其實呢份短期工去到12月23號就會完。
雖然塵太只係返咗一個月都唔夠，但相信呢個經歷都係好值得回味。如果當初塵太唔願意離開香港嘅comfort zone，係根本永遠無可能經歷得到。

窮港人總有生存方法。共勉之。

開心 Share

如果你鍾意塵氏嘅分享同埋想知道更多移民資訊嘅話，歡迎Follow塵氏Facebook 專頁同埋share 我地嘅文章比身邊嘅朋友仔啦~

相關文章: