是咁的， 喺英國工作方面嘅嘢，塵氏平時都係分享自己嘅嘢多，為咗等大家有多對英國嘅工作有多少少了解，塵太邀請咗一啲已經到埗咗英國一段時間嘅朋友做訪問，分享一下佢哋嘅親身工作經歷。之後會再有文章分享其他朋友嘅移英就業故事，希望幫助到大家對於英國嘅就業市場有進一步了解~
T先生背景介紹
T 先生已經到咗英國大半年， 一家四口落戶喺Nottingham，本身喺香港係從事文職工作，黎到英國三個月左右已經搵到第一份全職工作~ 喺到埗呢大半年，T先生已經轉到第四份工， 之前做過速遞相關文職、Warehouse、食物生產，而家做緊嘅就係工程生產相關嘅文職工作，工作主要做負責處理一啲Data同文件。
T先生嘅英國求職路
喺呢大半年嘅英國工作生涯入面，T 先生大大話話都已經見過幾十份工，全部都係全職工作。T先生搵工途徑都係啲大路求職網，例如Indeed、Totaljobs，見工試過真人見、phone in、網上見，有啲會有written test、aptitude test，連去site visit都試過。根據T先生經驗，有好多公司都會經Agency請人，有啲公司仲係一定經Agency請添~ 不過都仲有其他形式，例如要求你以自僱形式合作~ 有時候同一個工作崗位，經Agency做Recruitment有機會會高人工啲添。T先生第一份工就係經Agency請，佢形容間Agency超hea，上去填份表就可以開工~ 喺約見工之前，有啲Agency會先搵你傾傾，岩心水先比正式HR見，有啲就Agency加HR 一齊見。出糧有啲係時薪，有啲係月薪，有啲一個星期出一次糧，有啲就一個月出一次，呢啲都可以喺見工時了解下~
工作上會唔會語言障礙?
就語言溝通方面，T先生都會覺得challenging，始終香港人唔係以英文為母語，特別係文職工作，佢第一份工一開始要上training，已經要全日英文上堂，都幾燒腦~ 喺日常嘅工作入面，即事唔使對 “客”，就簡單如同事要教你點做，或者同同事間嘅日常溝通，都一定要講英文，所以從事文職工作嘅英文要有一定水平。而從事warehouse嘅要應付嘅英文，T 先生指會比較簡單，因為主要做單向式指令，正如T先生話: ｢嗰啲就係啲簡單嘅英文，就算聽唔到問多兩個人就會聽到。｣所以做Warehouse嘅英文要求會相對低一啲。T 先生表示，都見過一啲英文麻麻嘅非英國本地人，只要努力其實都做到一啲中層嘅職位，所以英文唔好嘅朋友都唔使太擔心~
T先生眼中的英國文化
對於英國嘅工作文化，T先生就覺得英國人嘅節奏無香港咁急速，正如大家喺搵屋搵學校嘅時候遇到嘅咁。但有啲外地攞VISA黎嘅人就會比較積極。不過，T先生覺得，有時就算同一間公司，唔同工作崗位嘅文化可能已經好唔同，例如有啲位可以一夠鐘就走人，但有啲位又會好多OT好大壓力，而本身英國人講嘢唔會直接話你唔好，就算比緊Comments你都會好婉轉，所以新到埗嘅朋友可以多作了解，學習聽佢地嘅弦外之音~ 而且有時公司有唔同口音嘅同事，簡單如 “I do it today”同 “I do it two day” ，兩句野讀音可以好似，但實際係兩個完全唔同意思，為免產生誤會，有唔清楚時一定要問清楚, ｢ 最重要係積極同想做嘢同解決問題嘅心態，呢個係重要嘅。｣
做乜要搞香港良民證?
T先生嘅第一份工，公司想佢轉做長工，但由於工作性質牽涉到禁區，公司要求T先生提供香港良民證。原來英國嘅公司有部份除左要入職前做DBS check之外，一啲工作性質牽涉到Health Care、教育、禁區呢啲都有機會要求香港良民證，不過由於T先生覺得搞香港良民證要去英國Police Station搞，等候時間都相當長，咁岩又有另一間公司offer，所以T先生直接轉工無搞香港良民證了。
考慮可以長做的因素
至於，一份工適唔適合長做落去，T先生就認為你份工本身係唔係長工，都好視乎個人需要，考慮嘅因素都同香港其實嘅差唔多，例如份工嘅工作待遇，你本身有無興趣喺呢方面發展、人工足唔足夠可以生活、人工有無上行空間、個人資金夠唔夠啦、有無需要申請按揭等，如果要就可能更加需要一份穩定收入。T先生而家份工面對最大問題依然係英文同文化，要用英文去學習工作knowledge依然都係吃力，不過T先生都會繼續做落去，因為係完全係佢喺香港本行嘅工作，呢個職位都係一個好嘅工作崗位。
總結
之後塵氏會再其他來自唔同界別朋友嘅移英就業故事嘅分享，有興趣嘅話一定要密切留意塵氏Blog啦~ 如果你鍾意塵氏分享嘅話同埋想知道更多移民資訊，歡迎Follow塵氏Facebook 專頁同埋我哋個blog share 比身邊嘅朋友仔啦~
