嚟緊準備移民英國嘅朋友們，對於喺香港準備倒嘅嘢，例如係申請VISA、買機票、訂酒店等等，大家都可以好有把握完成。但更多朋友對於移民後要處理事項表示擔心，唔知有乜係必做，好驚唔識做或者做漏。有見及此，塵氏嘅資訊擔當就簡單咁準備一個移民後處理事項 check list 同大家分享，睇完呢篇文章，大家就會對到埗後要做乜有個概念，按部就班就唔怕做錯啦。
移民後處理事項之移英後證件篇
以下會講解BNO visa 持有人到達英國後有咩後續事情要處理。
1) 攞 BRP (如有需要)
如果大家申請 BNO visa 個陣係去北角打指模，咁就有張BRP，大家記得指定日子內去指定郵局攞，如果遲咗去攞，張 BRP 係會送走去有關部門，之後大家要再搵有關部門攞返張 BRP 就麻煩喇。
2) 警署登記 (已取消)
大家留意返自己 visa approval 嘅文件，有無要求你去做警署登記，有就要盡快上網開個 account，約個日子親身去登記，以領取警察登記證 (Police Registration Certificate)，詳情可以睇睇塵氏之前嘅文章：
警署登記 I
https://www.facebook.com/105655338597914/posts/117232760773505/
警署登記 II
https://www.facebook.com/105655338597914/posts/117317177431730/
Remarks: 警署登記政策已於2022年8月初取消，詳情請參閱以下塵氏分享:
https://chansleeds.com/police-registration/
移民後處理事項之家居及日常生活篇
領取完有關文件及證書後，當然就要處理日常生活事項，重點如下:
3) 準備電話 sim card
一到埗有得上網好緊要，要打電話報平安睇地圖都要有張SIM CARD，如果大家想一黎到就有英國電話號碼同用電話上網，最簡單係去 Giffgaff 申請張 sim card，佢嘅好處係可以直接免費寄張 sim card 去香港，咁大家有卡喺手，可以 activate 定張 sim card，而且無合約綑綁。應付燃眉之急後，大家settle down 左就可以慢慢揀用邊間網絡供應商。
基於塵氏係一介窮L，所以係用另一間公司 Lebara，貪佢平，同埋有免費分鐘打返香港處理啲鎖碎事務。
以下係之前塵氏有關Lebara 介紹：
https://chansleeds.com/lebara/
4) 搵屋 (For唔係喺香港隔山買牛/租屋嘅朋友)
啱啱到埗英國，相信一般朋友都係租酒店/ airbnb 暫住一段時間，之後再慢慢搵屋租/買。除咗直接落 agent 舖頭或者去地產公司網頁，一般嚟講喺英國搵屋都係用以下平台：
- Rightmove
- Zoopla
- OnTheMarket
- OpenRent
- Facebook marketplace
- SpaceRoom
- Movebubble
塵氏當日搵屋就化身IT 狗嘅老友 — Mon Post 狗，日日定期 mon 住幾個主要嘅搵屋平台，有啱心水嘅盤就立即聯絡 agent約時間睇樓。以下係塵氏親身租屋分享：
https://chansleeds.com/rent-house/
5) 申請水電煤
有一個固定住址後，就要著手攪水電煤轉名。
水費
基本上得一個供應商，無得揀，想知住緊嘅區係用緊邊間供應商，可以去以下網頁 check ：https://www.water.org.uk/advice-for-customers/find-your-supplier/
電費及煤氣費
電 / 煤係可以自己選擇供應商，如果電煤都用同一間供應商，通常有特別優惠，所以一般黎講，電煤都會用一間供應商。轉供應商要時間處理，所以如果要你轉用新供應商，入伙頭兩星期點都要用返上手嘅供應商，想知用緊邊間供應商，可以直接問 agent，有時現有供應商係你入伙後會寄信俾你，咁大家就知用緊邊間公司。
而家科技發達，好多供應商嘅官網都有 chat room 俾大家同CS 傾計，甚至乎大家可以直接去供應商嘅 Facebook page ，經 messenger 搵 CS。只要同 CS 講新住戶叫咩名、地址、入伙日期、當日meter 讀數係幾多等資料，咁就攪掂。一般黎講入伙時嘅 meter 讀數，inventory report 都會有相，不過塵氏都鼓勵大家親自去影低meter 讀數做返個紀錄。
6) 通知 Council 入伙
買到 / 租到樓後，咁就要聯絡 Council，同佢講你邊日入伙，咁 Council 就會寄張單俾你交Council Tax。雖然Facebook股價一日跌左廿幾個 %，但經Facebook 問真係幾方便，塵氏都係經 Facebook Messenger 聯絡 Council， Leeds City Council 好有效率，即問即答，好快就收到 Council Tax Bill。
Remark：英國人做嘢真係未必完美，唔好信晒Agent嘅資料，特別要比錢嘅嘢，小心求證，佢話有meter無meter最好自己問問供應商，或者佢話幫搞晒水電煤council tax轉名都唔好大安旨意等運到，最好自己跟一跟！
7) TV Licence
之前介紹過，喺英國睇電視係要比TV Licence Fee，大家要諗下自己有無需要比。如果要睇電視，等收信，直接交錢就得。如果好似塵氏咁無睇任何直播節目(包括英國本地或海外)，咁就記得申報返自己唔使交TV Licence Fee。正所謂好文再重溫，唔怕俾人昆，以下係塵氏關於 TV Licence 嘅文章：
https://www.facebook.com/105655338597914/posts/107646668398781/
8) 家居寬頻
如果大家屋企無需要有 Wi-Fi 上網，用電話上網就夠，咁大家可以 skip 左呢 part，直接飛去下一 part。
英國裝寬頻，通常都係寄盒 router 俾你，要你自己安裝，其實唔難。如果唔安心自己裝，都可以搵師傅裝，但要額外俾錢。 塵氏為左唔想有合約束縛，方便日後搬遷，所以自制 sim card 上網大法，所以寬頻都唔使裝，詳情可以參閱：
https://chansleeds.com/uk-home-internet/
9) 幫屋企嘅主子搵學校
大部份人過黎都係為咗家中主子。如果小朋友到入學年齡，就要返學讀書，一般黎講，搵學校都係經 Council 報，其實大家一有住址證明就可以報學校，唔使等交咗Council Tax 先報得。 Leeds 報學校可以去以下網頁：
小學
https://www.leeds.gov.uk/schools-and-education/school-admissions/apply-for-a-primary-school
中學
https://www.leeds.gov.uk/schools-and-education/school-admissions/apply-for-a-secondary-school
移民後處理事項之雜項篇
最後處理晒以下事項，大家就可以盡情享受投入移英後嘅生活~
10) GP / Dental 登記
係英國，不幸病咗，一般都係去搵 pharmacy 買成藥，又或者搵 GP。大家可以去以下網頁，check 下屋企附近有邊間 GP 選擇：
https://www.nhs.uk/service-search/find-a-gp
網頁入面有寫GP 開放時間同大家嘅 comments，如果大家想睇多 d GP comments，可以直接係 Google search GP個名。咁係評論一欄就可以睇多啲comments，但一般黎講， 好多comments都係負評，因為有幾何大家會主動上 Google 留言讚人，大部分都係有問題先會主動上 Google 留言鬧爆佢，以洩心頭之恨。
揀好 GP 後，大家就要問 GP 收唔收新客，佢肯收嘅話就可以登記喇。如果間 GP 有網上登記，就可以直接填online form，如果無，就要親身落去同 GP 登記。
Dental 嘅話，就可以去以下網頁 check 附近有邊間選擇：https://www.nhs.uk/service-search/find-a-dentist
同 GP 差唔多，問問 Dental 收唔收NHS 新客，如果收就可以約日子做檢查。
關於約睇 GP 同 Dental 嘅經歷，可以參閱塵氏以下文章
英國睇 GP 記
https://chansleeds.com/gp/
尋找英國牙醫的故事
https://chansleeds.com/dental/
11) 申請 NI
黎到英國搵工，就要申請 National Insurance Number，亦即係大家口中嘅 NI number，申請NI係唔使俾住址證明，但要入左英國境先可以申請，唔可以係香港申請定先，申請網址如下：
https://www.gov.uk/apply-national-insurance-number
順帶一提，如果大家都係黎家軍，其實唔使等有 NI number 先可以返工，無都可以照搵工同返工，NI number 可以後補。不過事實上都有啲機構會堅持要見到 NI number 證明先請。
12) 開銀行戶口
有工開，當然要有銀行戶口出糧啦，英國除左實體銀行，仲有虛擬銀行，虛擬銀行都可以用黎出糧同處理大部分生活所需。大家可以根據自己需要睇下開邊間銀行戶口。
關於虛擬銀行，主要有Starling、Monzo、Atom、Revolut、First Direct 同Monese。有幾點值得大家選擇時考慮：
a) 除左 Revolut，以上幾間虛擬銀行都有 FSCS protection，即係£85,000 存款保障。Revolut 其實有立陶宛嘅銀行牌照，但佢嘅英國銀行牌照仲申請緊，所以佢無存款保障
b) 今年年初有新聞，騰訊購入左Monzo 部分股權，但Monzo無披露騰訊持股嘅細節
c) First Direct 係 HSBC UK 旗下銀行
13) 開 Cash Back account
啱啱到埗入伙，大把家居生活用品要添置，買咁多野都幾重皮，為左減輕成本，大家可以去各大 cash back 網頁開返個 account，實行邊買邊儲回贈，所謂積少成多，所以千祈唔好嫌麻煩啊！有咩唔識用可以問我地嘅資訊擔當塵生，詳情可以睇睇塵氏之前嘅文章：
https://chansleeds.com/cashback/
14) 買車/ 換車牌及有關車事宜
塵氏為無牌無車人士，對車係零經驗，只可以喺網上搵相關資料比大家參考～首先可到郵局或在DVLA官網取得D1表格，填好表格後，連同相片、申請費£43支票（抬頭寫上DVLA, Swansea）、有效嘅香港車牌正本(唔退返俾你) 、香港「駕駛執照細節證明」身份證明文件、BRP / Share Code俾DVLA驗證～ 持有UK Passport人士(包括BNO) ，只需填Passport No，其他護照人士(例如特區護照)就要寄埋本Passport去申請 ，將以上文件寄去DVLA就得。
以下為DLVA 網址:
https://www.gov.uk/dvlaforms
總結
總結幾句，上面係塵氏諗到大概到埗要做嘅嘢，未必最齊，只供參考。到最後，你會發現，未開工全職做呢啲嘢，其實可以快會做完，花最長時間就係“等”，所以大家可以放鬆心情，好好享受英國嘅新生活~~有問題歡迎搵塵氏傾傾，識答一定盡答~
開心分享
如果你鍾意塵氏嘅分享嘅話同埋想知道更多移民資訊，歡迎Follow塵氏Facebook 專頁同埋share 比身邊嘅朋友仔啦~
（以上資料只供參考，一切以官方網頁為準）
